Телевизийн нэрт хөтлөгч Опра Уинфри өөрийнхөө нэрээр нэрлэсэн алдартай ток шоугаа албан ёсоор хаалаа.

Тэрбээр төгсгөлийн нэвтрүүлгээ Чикагогийн "Chicago's United Center"-т хийсэн бөгөөд шоуг нь нэрт жүжигчин Том Хэнкс хөтөлсөн ажээ. Мөн хаалтынхаа нэвтрүүлэгт хөтлөгч бүсгүй алдарт дуучин Мадонна, жүжигчин Том Круз, дуучин Бейонсе нарыг зочноор урьж оролцуулжээ. Харин түүний шоу нэвтрүүлгийн төгсгөлийн зочин нь Арнольд Шварцнеггерийн хуучин эхнэр Мария Шрайвер байсан ажээ. Тэрбээр саяхан гэр бүлээ цуцлуулсан эмэгтэйгээс хуучин нөхөр нь хэрхэн хуурч байсныг дэлгэрэнгүй яриулж, алдарт жүжигчний карьераа мужийн амбан захирагч болтлоо ашигласан "өөдгүй эр”-ийн үнэн дүр төрхийг олны өмнө илчилсэн байна. Опра Уинфри шоу нэвтрүүлгээ ийнхүү хаачихаад зүгээр суухгүй нь мэдээж. "Oprah Winfrey Network” хэмээх кабелийн телевизийн ажилдаа өөрийгөө бүрэн зориулахаар шийдсэн хөтлөгч бүсгүй амжилтын оргил руу гарахдаа итгэлтэй байгаагаа хэлсэн аж.