Улстөрч дахин секс гэмт хэрэгт холбогдлоо - 15 May 2011

Олон улсын валютын сангийн тэргүүн Доминик Штраус Кан зочид буудлын үйлчлэгч эмэгтэйг хүчиндэх гэж оролдсон хэргээр Нью Йоркийн цагдаагийн газар байцаагдаж байна. Түүнийг Парис руу нисэхээс ердөө хэдхэн хормын өмнө Жон Кеннедигийн нисэх онгоцны буудлаас баривчилжээ. Мөрдөн байцаагч нар ням гаригт түүнээс байцаалт авчээ. Францын Сангийн сайд асан, Социалист намын тэргүүн тэрбээр ерөнхийлөгчийн сонгуульд нэр дэвших рейтинг өндөртэйд тооцогддог. Дээрх хэргийн улмаас тэрбээр даваа гаригт Брюссельд болох Европын холбооны сангийн сайд нарын уулзалтад оролцох боломжгүй болж байгаа бололтой. Уулзалтаар Португал болон Грект санхүүгийн тусламж олгох асуудлыг хэлэлцэх ажээ. Олон улсын валютын сангийн тэргүүн Нью-Йоркийн нэгэн зочид буудлын үйлчлэгч 32 настай эмэгтэйг хүчиндэхийг завдаж, өрөөндөө хорьсон нь тогтоогдвол хуулийн хариуцлага хүлээнэ” гэж Нью-Йоркийн цагдаагийн газрын төлөөлөгч мэдээлжээ. Тэрбээр мөн Манхэттен зочид буудлын үйлчлэгчид хүч хэрэглэсэн хэргээр шалгуулж байгаа юм байна.
Гомдол гаргасан бүсгүй зөөлөн гэмтлийн улмаас эмнэлэгт хэвтсэн гэнэ. Харин Доминик Штраус зочид буудлаас явахдаа их л яарсан байдалтай, гар утас, эд зүйлээ орхисон байжээ. Харин Олон улсын валютын сан одоогоор ямар нэгэн мэдэгдэл хийгээгүй байгаа юм байна.
Доминик Штраус Кан өнгөрсөн жил Олон улсын валютын сангийн тэргүүнээр сонгогдсон билээ. Тэрбээр хямралаас дөнгөж гараад буй дэлхийн эдийн засагт Олон улсын валютын сангийн хувь нэмэр их байх болно гэж мэдэгдэж байсан юм. 2008 онд мөн л Доминик Штраусын хамтран ажиллагч бүсгүйтэй жиг ургуулсан хэрэг нь шуугиан дэгдээж, Олон улсын валютын сангийн удирдах зөвлөлөөр хэлэлцэж байжээ. Тэрбээр тухайн үед эхнэрээсээ болон "найз бүсгүй”-гээсээ уучлал гуйсан ажээ. Доминик Штраус 2012 оны Францын ерөнхийлөгчийн сонгуульд нэрээ дэвшүүлэх эсэхээ мэдэгдээгүй ч олон ажиглагчид түүнийг ерөнхийлөгчийн сонгуульд өрсөлдөнө гэж таамаг дэвшүүлж байгаа юм байна.